Chris Anderson, sem lék hér á landi á síðasta tímabili, átti góðan leik í D-League á sunnudaginn en hann skoraði þá 15 stig og tók 14 fráköst í sigri Grand Rapids Drive á Long Islands Nets.
Chris hóf síðasta tímabil með FSu og lék með þeim 11 leiki í deild og bikar áður en hann var látinn fara í byrjun nóvember. Hann var þó ekki lengi án liðs því Ísfirðingar sömdu við hann fljótlega eftir það og lék hann með liðinu til jóla. Hann spilaði samtals 16 leiki hér á landi og var með í þeim 22,3 stig og 8,8 fráköst að meðaltali í leik.
D-deildin (NBA Development League) er eins og margir vita undir hatti NBA deildarinnar og ekki óalgengt að leikmenn þaðan endi í NBA deildinni.
Í haust mætti Chris á 140 manna opnar æfingar hjá Grand Rapids með það fyrir augum að komast í 20 manna æfingarbúðir liðsins fyrir undirbúningstímabilið. Það hafðist og gott betur því hann komst að lokum í 12 manna leikmannahóp liðsins fyrir tímabilið.
