Mynd: Ingvi Stígsson
Samkvæmt heimildum síðunar hafa Bolvíkingar riðið á vaðið og sagt spilandi þjálfara sínum til þriggja mánaða, Neil Shirani Þórissyni, upp störfum. Eftir góða byrjun undir hans stjórn hafði allverulega farið að hitna undir honum eftir að liðið tapaði þremur leikjum í röð í nóvember.
Botninn mun þó hafa tekið úr þegar hann tilkynnti á æfingu í vikunni að hann hyggðist færa sig úr skotbakvarðarstöðunni yfir í leikstjórnandastöðuna og þar með koma upp með boltann í öllum sóknum. Greip um sig mikil skelfing og ringulreið innan liðsins við þessi tíðindi enda sáu helstu stórskyttur liðsins fram á að skottækifærum þeirra í leikjum myndi fækka um allt að 75% við þessa tilfærslu. Samkvæmt heimildum síðunar mun Hjalti Már Magnússon, sem síðast gaf stoðsendingu árið 2006 þegar hann missti boltann í hendur samherja, hafa boðað til neyðarfundar innan liðsins þar sem ákveðið var að láta þjálfarann fjúka.
Ekki voru þó allir á eitt sáttir með ákvörðunina en Stefáni Þór Hafsteinssyni, byrjunarliðsmiðherja Bolvíkinga var mikið niður fyrir við tíðindin og furðaði sig ítrekað á því af hverju engin væri að hugsa um Hafdísi og börnin í þessu öllu saman.
Í stað Shirans hefur Hnífsdælska goðsögnin Þórir Guðmundsson verið ráðinn nýr þjálfari félagsins, en hann háði harða kosningarbaráttu fyrir stöðunni með loforðum um fleiri skot og aukinn spilunartíma fyrir alla, auk þess sem hann myndi tryggja það að Hjalti Már hefði ávallt sérbolta á æfingum til þess að hann þyrfti ekki að deila honum með öðrum.
Í öðrum fréttum er það helst að Ísfirðingar ákváðu að fara sömu leið og nágrannar þeirra í Bolungarvík en formaður KFÍ, Neil Shiran Þórisson, rak þjálfara þeirra Ísfirðinga úr starfi í dag og eftir góða 15 mínútna umhugsun yfir kaffibolla ákvað hann að ráða engan annan en Neil Shiran Þórisson, fráfarandi þjálfara UMFB, í starfið.
